Konstruksyon sa Agusan Bridge, gilaumang makatabang sa pagsaka sa ekonomiya sa Butuan City
Gilaumang mosaka ang ekonomiya sa Butuan City kung makumpleto na ang konstruksyon sa Agusan Bridge sa Barangay Bilay tabok sa Barangay Dulag ning syudad.
Kini tungod mas sayon na sa mga negosyante ug mag-uuma ang pagsulod ug pagbyahe sa mga abot gikan sa kaumahan.
Pabor sab kini sa mga mag-uuma ug negosyante tungod mominus na ang gasto ug mokunhod na ang oras sa byahe padulong sa merkado asa apil nga makabenipisyo ang mga silingang barangay ug kasikbit nga munisipyo.
Gumikan niini nga kalambuan sa syudad positibo si Mayor Ronnie Vicente Lagnada sa pagdagsa sa mga negosyanteng mobubo og negosyo sa dapit ilabina usa kini sa dunay dakung potensyal sa industriya sa turismo ug agrikultura.
Sa karon anaa na sa kapin 90 porsyento ang dagan sa konstruksyon sa Agusan Bridge-East-West Lateral connecting Agusan del sur/Agusan del Norte padulong Bukidnon, Barangay Bilay-Barangay Dulag.Gilaumang mahuman karong tuiga ang konstruksyon sa pagpatuman sa DPWH ug sa pagtinabangay nila Congressman Jose Aquino II ug kanhi congressman ug karon Vice Mayor Lawrence Fortun aron makakuha og pondo sa national. Kini subay sa plano ug direktiba ni Mayor Ronnie Vicente Lagnada aron hingpit na kining magamit sa tanan. ###
