Bag-ong health services unit ug ekipo gitanyag sa Agusan del Norte Provincial Hospital
By J-ann Mag-aso
DAKBAYAN SA BUTUAN — Dugang mga pasyente na ang maatiman ug daghang paagi sa operasyon ug test na ang mahimo sa Agusan del Norte Provincial Hospital tungod sa ubay-ubay nga bag-ong mga serbisyo nga gilusad ug pasilidades nga nabatonan na niini lambigit sa upgrading nga gihimo subay sa Amomang Agusanon Program ubos sa AGUSAN UP!, ang development agenda sa administrasyon ni Governor Dale B. Corvera.
Mahimong dakung tabang usab ang maong mga serbisyo ug pasilidades sa paninguha sa administrayon ni Gov. Corvera nga maatiman og maayo sa probinsya ang mahimong mga pasyente sa COVID-19.
Sa pakighinabi sa Agusan Up Information Service Unit kang Dr. Odelio Ferrer, Provincial Health Officer, gipasigarbo niini ang mosunod nga mga bag-ong serbisyo ug pasilidades sa PHO nga mamahimong pahimuslan sa tanang Agusanons: Intensive Care Unit (ICU) Adult/Pedia, Neonatal Intensive Care Unit, High Risk Pregnancy Unit, Respiratory Unit, Physical Therapy Unit, Endoscopy Unit, Minimal Access Surgery Unit, Covid-19 Triage, Queuing System ug New Admitting Section.Gibutyag usab ni Dr. Ferrer nga subay sa gitinguha nga hospital upgrade ilabina sa mga laboratoryo niini, nabatonan na usab sa maong tambalanan ang mosunod nga mga ekipo: 2D Echocardiogram and Doppler alang sa mga buros, CT-Scan, C-arm radiographic system, Endoscopy Tower ug uban pa.
Gawas niini, adunay usab mga bag-ong espesyalista nga mga doktor sa probinsya nga andam mo-serbisyo sa mga Agusanons.
Mahinumduman nga giablihan ang ICU niadtong buwan sa Hunyo. Gitambongan mismo ni Gov. Corvera ang maong okasyon ug didto gipadayag niya nga mahimong dakung tabang usab ang maong mga pasilidades sa paninguha sa probinsya nga mahimong mas andam pa pag-atiman sa mga pasyente sa COVID-19.
Gibutyag usab ni Gob. Corvera sa iyang Governor’s Report atol sa 53rd Araw ng Agusan del Norte nga dakung pagtagad ang ihatag sa iyang administrasyon sa serbisyo sa mga hospital sa probinsya tungod kay sa maong hawanan sa serbisyo lamang (tertiary health services) nga naay direktang papel ang probinsya pag-atiman sa mga Agusanon.Dugang sa gobernador nga naa ang mga munisipyo ug barangay nga nag-atiman sa frontline services sa ubang aspeto sa serbisyo alang sa mga tawo ug ang gihimo sa probinsya dinhi mao ang pagsuporta kanila aron maseguro nga maatiman usab ang maong mga serbisyo. (Agusan Up, LGU Agusan del Norte/PIA Agusan del Norte)
